राज्यात करोना संसर्ग अधिकच झपाट्याने वाढत आहे. दररोज मोठ्या संख्येने नवीन करोनाबाधित आढळून येत असून, मृत्यूंच्या संख्येतही मोठी भर पडत आहे. अगदी सर्वसामान्य नागरिकांपासून ते दिग्गजांपर्यंत सर्वचजण करोनाच्या विळख्यात सापडत आहेत. आता बॉलिवूड अभिनेते कुमुद मिश्रा यांना करोना झाल्याचे समोर आले आहे. त्यांना मध्य प्रदेशातील रीवा येथील खासगी रुग्णालयात दाखल करण्यात आले आहे. कुमुद यांना श्वासोच्छवासाचा त्रास सुरू झाल्यानंतर रुग्णालयात दाखल करण्यात आले होते. गेल्या तीन दिवसांपासून कुमुद मिश्रा यांच्यावर रुग्णालयात उपचार सुरू आहेत. सुरुवातीला कुमुद यांच्या आईची करोना चाचणी पॉझिटिव्ह आली होती. त्यानंतर त्यांच्या आईला रुग्णालयात दाखल करण्यात आले होते. दरम्यान, आपल्या आईची काळजी घेत असताना कुमुद यांना करोनाची लागण झाल्याची माहिती समोर आली आहे. कुमुद यांच्या आधी बॉलिवूडमधील अनेक कलाकारांना करोनाची लागण झाली होती. अक्षय कुमार, गोविंदा, आलिया भट्ट, आमिर खान, रणबीर कपूर यांना करोनाची लागण झाली होती. कुमुद मिश्रा यांनी 'रुस्तम', 'रिव्हॉल्वर राणी', 'जॉली एलएलबी 2', 'रांझणा', 'मुल्क', 'बदलापूर', 'थप्पड', 'एअरलिफ्ट', 'एमएस धोनी: द अनटोल्ड स्टोरी', 'सुल्तान' चित्रपटांमध्ये आपल्या अभिनयाने लोकांचे लक्ष वेधून घेतले आहे.
