छोट्या पडद्यावरील लोकप्रिय अभिनेत्री श्रेनू पारिख हिला करोनाची लागण झाली आहे. श्रेनूने इन्स्टाग्रामच्या माध्यमातून ही माहिती दिली. काही दिवसापूर्वी श्रेनूला करोनाची लागण झाली असून सध्या तिच्यावर रुग्णालयात उपचार सुरु आहेत. तसंच तिच्यात हळूहळू तिच्या प्रकृतीत सुधारणा होत आहे.

“काही दिवसांपूर्वी माझी करोना चाचणी पॉझिटिव्ह आली आहे. मी रुग्णालयता अॅडमिट असून हळूहळू माझ्या प्रकृतीत सुधारणा होत आहे. माझ्यासाठी आणि माझ्या कुटुंबीयांसाठी देवाकडे प्रार्थना करा. मी मनापासून करोना वॉरियर्सचे आभार मानते. या कठीण प्रसंगात ते प्रत्येक रुग्णाची व्यवस्थित काळजी घेत आहेत”, असं श्रेनूने तिच्या पोस्टमध्ये म्हटलं आहे.

पुढे ती म्हणते, “जर योग्य काळजी घेऊन सुद्धा जर तुम्हाला करोनाची लागण झाली तर असं समजा की एक अदृश्य राक्षस तुमच्या समोर आहे आणि तुम्हाला त्याच्याशी लढायचं आहे. त्यामुळे कृपया काळजी घ्या”.

दरम्यान, श्रेनू छोट्या पडद्यावरील लोकप्रिय अभिनेत्री आहे. ‘भ्रम…सर्वगुण संपन्न’ या मालिकेतून तिने कलाविश्वात पदार्पण केलं होतं. त्यानंतर ‘इश्कबाज’, ‘इस प्यार को क्या नाम दूं’, ‘दिल बोले ओबेरॉय’, ‘ब्याह हमारी बहु’ या मालिकांच्या माध्यमातून ती घराघरात पोहोचली.