गायक अदनान सामीने सोशल मीडियावर आशा भोसले, लता मंगेशकर आणि नूर जहाँ यांचा फोटो पोस्ट केला होता. एकीकडे सोशल मीडियावर या फोटोवर लाइक्स व कमेंट्सचा वर्षाव होत असताना एका युजरने गानसम्राज्ञी लता मंगेशकर यांच्याविरोधात कमेंट पोस्ट केली. त्या युजरने अदनानने सडेतोड उत्तर दिलं आहे.

अदनान सामीच्या पोस्टवर त्या संबंधित युजरने लिहिलं, ‘लता मंगेशकर यांचा आवाज खूप चांगला आहे, हे विचार करण्यासाठी भारतीयांचा ब्रेनवॉश केला गेलाय.’ यावर अदनानने उत्तर दिलं, ‘बंदर क्या जाने अदरक का स्वाद (हिंदीतल्या या म्हणीला समानार्थी मराठीतील म्हण- गाढवाला गुळाची चव काय?) स्वत:च्या प्रत्येक शंकेवर प्रश्न उपस्थित करून मूर्ख बनण्यापेक्षा गप्प राहावं.’

अदनानच्या उत्तरानंतर दिग्दर्शक विवेक अग्निहोत्री यांनीसुद्धा लतादीदींसाठी काही ट्विट केले. ‘मी देवाकडे प्रार्थना करतो की, लता मंगेशकरांचा द्वेष करणाऱ्यांनी पुढच्या जन्मी आमच्यासारखे बनून जन्म घ्यावा, जेणेकरून त्यांना सौंदर्य आणि दिव्यता समजू शकेल. मी देवी सरस्वतीवर विश्वास ठेवण्यामागचं एक कारण म्हणजे लता मंगेशकर आहेत आणि दानवांवर विश्वास ठेवण्यामागचं कारण म्हणझे त्यांचा द्वेष करणारे लोक’, असं ट्विट त्यांनी केलं.