नुकताच प्रदर्शित झालेल्या ‘उडता पंजाब’मधील अभिनयाने अभिनेत्री आलिया भटने बॉलिवूडसह अनेक प्रेक्षकांचे लक्ष आपल्याकडे वेधून घेतले. सहकलाकारांसह अनेकांनी आलियाच्या कामाचे तोंडभरून कौतुक केले. अभिनेत्री करिना कपूरने तर आलियाला या चित्रपटातील भूमिकेसाठी राष्ट्रीय पुरस्कार मिळायला पाहिजे, असे सांगत तिच्या पाठीवर कौतुकाची थापच मारली.
‘उडता पंजाब’साठी आलिया भटला राष्ट्रीय पुरस्कार मिळायला हवा – करीना कपूर
‘उडता पंजाब’नंतर आलिया आता पुढील चित्रपटासाठी सज्ज झाली असून, त्याची पूर्वतयारीही तिने सुरू केलीये. यासाठी सध्या ती जीममध्ये कठोर परिश्रम घेत असल्याचे पाहायला मिळते. पुढच्या चित्रपटातील व्यक्तिरेखेसाठी आलिया जीममध्ये जाऊन मेहनत घेत आहे, अशी माहिती मिळालीये. बॉलिवूडमधील अनेक तारे-तारकांना जीममध्ये प्रशिक्षण देणाऱ्या यास्मिन कराचीवाला याच आलियालाही सध्या प्रशिक्षण देत आहेत. तिच्याकडून दररोज कठोर परिश्रम करून घेतले जात आहेत. खुद्द यास्मिन कराचीवाला यांनीच त्यांच्या ‘इन्स्टाग्राम’ अकाऊंटवर याचा एक व्हिडिओ शेअर केला आहे. या व्हिडिओमध्ये आलिया काही व्यायामाचे प्रकार करताना पाहायला मिळते.