गेल्या काही दिवसांपासून बॉलिवूड अभिनेत्री कंगना रणौत सातत्याने चर्चेत येत आहे. कधी तिच्या वादग्रस्त वक्तव्यांमुळे तर कधी अन्य कारणांमुळे ती सतत प्रकाशझोतात राहत आहे. मात्र, या सगळ्यातून बाहेर पडत कंगना आता तिच्या आगामी चित्रपटांच्या चित्रीकरणाकडे वळली आहे. अलिकडेच तिने थलायवी या चित्रपटाचं चित्रीकरण सुरु केलं आहे. विशेष म्हणजे थलायवीसोबतच तिने धाकड या चित्रपटासाठीदेखील खास मेहनत करण्यास सुरुवात केली आहे.

भाऊ अक्षतचं लग्नकार्य झाल्यानंतर कंगनाने थेट हैदराबाद गाठलं असून तिथे थलायवीच्या चित्रीकरणास सुरुवात केली आहे. विशेष म्हणजे या चित्रपटासोबतच तिने धाकड या चित्रपटाचीदेखील तयारी सुरु केली आहे. कंगनाने सोशल मीडियावर तिचे काही फोटो शेअर केले आहेत. या फोटोमध्ये कंगना वर्कआऊट करताना दिसत आहे.

“मला मल्टीटास्क करायला आवडत नाही, पण या काळात सुरूवातीला जशी मेहनत घेतली आहे तशी मेहनत घेण गरजेच आहे. म्हणून मी ‘थलायवीच्या चित्रीकरणासोबत ‘धाकाड’च्या अॅक्शन रिहर्सलला सुरूवात केली आहे, असं कॅप्शन कंगनाने या फोटोला दिलं आहे.

दरम्यान, कंगना लवकरच ‘तेजस’ चित्रपटाच्या माध्यमातून प्रेक्षकांच्या भेटीला येणार आहे. या चित्रपटांमध्ये ती महत्त्वपूर्ण भूमिकेत पाहायला मिळणार आहे.