करोना विषाणूचा वाढता संसर्ग रोखण्यासाठी देशात ३ मे पर्यत लॉकडाउन वाढविण्यात आला आहे. या काळात अत्यावश्यक सुविधा सोडल्या तर सारं काही बंद आहे. त्यामुळे कलाविश्वातील कामकाजही ठप्प असल्याचं दिसून येतं. मात्र या क्षेत्रात रोजंदारीवर काम करणाऱ्यांना अनेक संकटांचा सामना करावा लागत आहे. त्यामुळे अनेक सेलिब्रिटींनी अशा गरजूंना मदत केली आहे. विशेष म्हणजे अमिताभ बच्चन यांनी बॉलिवूड चित्रपटांसाठी काम करणाऱ्या कामगारांना मदत केल्यानंतर आता दाक्षिणात्य चित्रपटसृष्टीतील गरजू कामगारांसाठी मदतीचा हात पुढे केला आहे. देशात लॉकडाउन घोषित केल्यामुळे अनेक मालिका, चित्रपट, वेबसीरिज यांचं चित्रीकरण रखडलं आहे. त्यातच चित्रीकरणाच्या सेटवर रोजंदारीवर काम करणाऱ्या कामगारांना मात्र सध्या अनेक संकटांना सामोरं जावं लागत आहे. या काळात अनेक सेलिब्रिटींनी अशा कामगारांना मदतही केली आहे. मात्र बिग बींनी आता त्यांच्या मदतीचा मोर्चा दाक्षिणात्य कलाविश्वाकडे वळविला आहे. त्यांनी तेलुगू सिनेकर्मचाऱ्यासाठी १.८ कोटी रुपयांची आर्थिक मदत केली आहे. Amit ji @SrBachchan has arranged 12000 Corona Relief Coupons of Rs1500 each to be distributed to the Daily wage Film workers in Telugu States from the proceeds of #Family.A BIG THANK YOU to ‘BIG B’ for this wonderful initiative.These coupons can be redeemed at #BigBazaar stores pic.twitter.com/XK0vjL38MT — Chiranjeevi Konidela (@KChiruTweets) April 17, 2020 अमिताभ बच्चन यांनी तेलुगू सिनेकर्मचाऱ्यांना केलेल्या मदतीनंतर दाक्षिणात्य सुपरस्टार चिरंजीवीने सोशल मीडियाच्या माध्यमातून अमिताभ बच्चन यांचे आभार मानले आहेत. ' अमिताभ जी यांनी तेलुगू कलाविश्वातील रोजंदारीवर काम करणाऱ्या कर्मचाऱ्यांसाठी १५०० रुपयांचे १२ हजार रिलीफ कुपन दिले आहेत. कर्मचाऱ्यांसाठी केलेल्या या मदतीसाठी बिग बी तुमचे मनापासून आभार. या कुपनचा वापर बिग बाजारमध्ये करता येऊ शकतो, असं ट्विट चिरंजीवने करुन ही माहिती दिली. दरम्यान, आतापर्यंत मराठी कलाविश्वापासून ते दाक्षिणात्य कलाविश्वापर्यंत अनेक सेलिब्रिटींनी त्यांना शक्य होईल त्याप्रमाणे मदतीचा हात पुढे केला आहे. यामध्ये सलमान खान, शाहरुख खान,आमिर खान, महेश बाबू,सोनू सुद,चिरंजीवी या सारख्या कलाकारांचं आवर्जुन नाव घेतलं जातं.