बॉलिवूड अभिनेता सुशांत सिंह राजपूत याने गळफास घेऊन आत्महत्या केली. त्याच्या आत्महत्येचं कारण अद्याप समजू शकलेलं नाही. मात्र या घटनेमुळे सर्वांनाच आश्चर्याचा धक्का बसला आहे. दरम्यान अमुलने आपल्या अनोख्या शैलीत सुशांतला श्रद्धांजली वाहिली आहे.

“इक वारि फिर से आ भी जा यारा” असं म्हणत अमुलने एक कार्टून फोटो पोस्ट केला आहे. यामध्ये सुशांतने आजवर साकारलेल्या तीन व्यक्तिरेखा कार्टून फॉर्ममध्ये दिसत आहेत. “इक वारि फिर से आ भी जा यारा” हे सुशांतच्या ‘राबता’ चित्रपटातील गाणं आहे. हा चित्रपट २०१७ मध्ये प्रदर्शित झाला होता. तीन वर्षांपूर्वी हे गाणं प्रचंड चर्चेत होतं. या चित्रपटात सुशांतसोबत अभिनेत्री क्रिती सेनॉन देखील झळकली होती. अमुलने दिलेली ही अनोखी श्रद्धांजली सध्या सोशल मीडियावर सर्वांचेच लक्ष वेधून घेत आहे.

सुशांतचा थक्क करणारा प्रवास

सुशांतने नैराश्यामुळे आत्महत्या केली असं म्हटलं जात आहे. मात्र अद्याप त्याबद्दल अधिकृत माहिती मिळाली नाही. ‘शुद्ध देसी रोमान्स’, ‘डिटेक्टिव्ह ब्योमकेश बक्षी’, ‘एम. एस. धोनी : द अनटोल्ड स्टोरी’, ‘केदारनाथ’, ‘छिछोरे’ यांसारख्या चित्रपटांमध्ये त्याने दमदार भूमिका साकारल्या आहेत. २००९ मध्ये ‘पवित्र रिश्ता’ या मालिकेतून तो घरघरांत पोहोचला. त्याच्या अभिनयाचं सर्वत्र कौतुक झालं.