दोन वर्षांपूर्वी दिवाळी पाडव्याच्या मुहूर्तावर अभिनेता सुबोध भावेचा बहुचर्चित आणि बहुप्रतिक्षित असा ‘आणि..डॉ. काशिनाथ घाणेकर’ हा चित्रपट प्रदर्शित झाला. मराठी रंगभूमीचे पहिले सुपरस्टार काशिनाथ घाणेकर यांच्या जीवनावर बेतलेल्या या चित्रपटाच्या टीझरपासून संवाद, गाणी यांची चर्चा प्रेक्षकांमध्ये सुरु झाली होती. चित्रपटालाही पहिल्या दिवसापासून, पहिल्या शो पासून प्रेक्षकांचा ‘एकदम कडक’ प्रतिसाद मिळाला होता. आता हा चित्रपट प्रेक्षकांना ओटीटी प्लॅटफॉर्मवर पाहता येणार आहे. 'नेटफ्लिक्स'वर हा चित्रपट प्रेक्षकांना पाहता येणार आहे. चित्रपटामधील कलाकारांचा उत्तम अभिनय, कथा यामुळे प्रेक्षकांनी चित्रपटाला उदंड प्रतिसाद दिला होता. यामध्ये डॉ. काशिनाथ घाणेकर यांच्या उदय– अस्ताचा प्रवास दाखविण्यात आला आहे. सुबोध भावेने डॉ. काशिनाथ घाणेकर यांची भूमिका साकारली. काशिनाथ घाणेकर यांचा लूक, संवाद फेक, अस्वस्थता, बिनधास्तपणा, बेफिकीरीपणा, त्यांचे अभिनयाबद्दलचे वेड हे अतिशय उत्तमप्रकारे सुबोध भावेने साकारले आहे. चित्रपटामधील सोनाली कुलकर्णी, सुमित राघवन, मोहन जोशी, आनंद इंगळे, प्रसाद ओक, वैदेही परशुरामी, नंदिता धुरी यांच्या भूमिका देखील प्रेक्षकांच्या पसंतीस पडल्या होत्या. या सिनेमाचे दिग्दर्शन अभिजीत देशपांडे यांनी केले आहे. ज्यांचा पाहायचा राहिला असेल आणि ज्यांना पुन्हा पहायचा आनंद घ्यायचा असेल त्यांच्यासाठी, "आणि डॉ काशिनाथ घाणेकर" आता @NetflixIndia वर उपलब्ध@unbollywood pic.twitter.com/PhbS21hVbL — Subodh Bhave (@subodhbhave) September 10, 2020 डॉ. काशिनाथ घाणेकर यांच्या आयुष्यातील रंगभूमीचे, नाटकाचे महत्व, उतरती कळा लागल्यानंतर त्यांनी स्वत:ला सावरण्याचा केलेला प्रयत्न, काशिनाथ घाणेकर आणि इरावती घाणेकर तसेच डॉ. काशिनाथ घाणेकर आणि कांचन घाणेकर यांचा प्रवास, अशा विविध छटा उत्तम प्रकारे सुबोध भावेने या चित्रपटामध्ये साकारल्या आहेत. मराठी चित्रपट आणि रंगभूमीचा सुवर्णकाळ या चित्रपटातून प्रेक्षकांना अनुभवायला मिळतो.