हॉलिवूडमधील अॅस्टन कचर आणि मिला कुनीस या प्रसिद्ध जोडप्याने इटली येथे नुकत्याच झालेल्या एका लग्नसोहळ्यात चक्क पारंपरिक भारतीय पोशाखात हजेरी लावली होती. अॅस्टन कचर आणि त्याची वाग्दत्त वधू मिला यांनी त्यांच्या मित्राच्या लग्नासाठी खास भारतीय पद्धतीचे पोशाख परिधान केले होते. निळ्या रंगाचा नक्षीकाम केलेला कुर्ता आणि डोक्यावर लाल रंगाचा फेटा घातलेल्या अॅस्टनने अनेकांना आश्चर्याचा धक्का दिला. तर दुसरीकडे मिला कुनीसनेसुद्धा भारतीय पद्धतीचा मिंट गाऊन परिधान केला होता. यावेळी प्रवेशद्वारावर भारतीय वेषात पाहुण्यांच्या स्वागतासाठी उभ्या असणाऱ्या अॅस्टन कचरने खास बॉलीवूड स्टाईलचे नृत्य करत उपस्थितांचे मनोरंजनही केले.
