बिग बॉस १३ या रिअॅलिटी शोमधील सर्वाधिक चर्चेत राहिलेला स्पर्धक म्हणजे असिम रियाज. ‘बिग बॉस १३’चं पर्व संपल्यानंतरही असिमची लोकप्रियता कायम आहे.त्यामुळे त्याच्याविषयी जाणून घेण्यास चाहते कायमच उत्सुक असतात. अलिकडेच असिमने मुंबईत स्वत:च्या हक्काचं घर घेतलं असून त्याच्या या घराची चर्चा सध्या चाहत्यांमध्ये रंगली आहे.

असिमने सी फेसिंग असलेलं घर घेतलं असून याचे काही फोटो सोशल मीडियावर शेअरदेखील केले आहेत. असिमने इन्स्टा स्टोरीमध्ये त्याच्या घराचे फोटो शेअर केले होते. तसंच असिमच्या चाहत्यांनी त्याच्या घराचे फोटो आणि व्हिडीओदेखील फॅनपेजवर शेअर केले आहेत.

“जेव्हा आपली मुलं मेहनत आणि प्रबळ इच्छाशक्तीच्या जोरावर यश संपादन करतात त्यावेळी वडिलांच्या डोळ्यातला आनंद त्यांना लपवता येत नाही. आज हा व्हिडीओ पाहून मला खरंच फार आनंद होत आहे. असिमच्या घरातून समुद्र किनारा दिसत आहे”, अशा भावना असिमच्या वडिलांनी व्यक्त केल्या.

असिम रियाज हा ‘बिग बॉस १३’मध्ये अंतिम फेरीपर्यंत पोहोचला होता. शेवटच्या फायनलिस्टमध्ये त्याचा सहभाग होता. मात्र, ‘बिग बॉस १३’ चा किताब सिद्धार्थ शुक्लाने पटकावला. विशेष म्हणजे ‘बिग बॉस’नंतरही असिमची लोकप्रिय कायम आहे. त्याने हिमांशी खुराना आणि जॅकलीन फर्नांडिससोबत म्युझिक अल्बममध्येही काम केलं आहे.