भारताचे महान माजी धावपटू आणि ‘फ्लाईंग सिख’ अशी ओळख असलेले मिल्खा सिंग यांच्या निधनाच्या बातमीनंतर संपूर्ण देशभरातून दु:ख व्यक्त केलं जातंय. १९५८च्या राष्ट्रकुल क्रीडा स्पर्धेतील २०० आणि ४०० मीटर प्रकारात सुवर्णपदक पटकावणारे मिल्खा सिंग हे पहिले भारतीय ठरले होते. मिल्खा सिंग यांचा हा विक्रम ५० वर्षांहून अधिक काळ कायम राहिला. मिल्खा सिंग यांच्या निधनानंतर देशातील विविध स्तरांतून त्यांना श्रद्धांजली वाहिली जातेय. बॉलिवूडमधील देखील अनेक सेलिब्रिटींनी सोशल मीडियावर पोस्ट शेअर करत शोक व्यक्त केलाय.

बॉलिवूडचे बिग बी अमिताभ बच्चन यांनी एक ट्वीट करत मिल्खा सिंग यांच्या निधानाचं दु:ख व्यक्त करत त्यांना श्रद्धांजली वाहिली आहे. “दु:खात..मिल्खा सिंग यांचे निधन ..भारताचा अभिमान .. एक उत्तम धावपटू…एक महान व्यक्ती..त्यांच्यासाठी प्रार्थना” असं म्हणत बिग बी अमिताभ बच्चन यांनी श्रद्धांजली वाहिली आहे.

आणखी वाचा: ‘मी हे स्विकारायलाच तयार नाहीये’; मिल्खा सिंग यांच्या निधनाने फरहान अख्तर भावूक

तर अभिनेत्री प्रियांका चोप्राने देखील ट्विटरवर पोस्ट शेअर करत मिल्खा सिंग यांच्या कुटुबियांचं सांत्वन केलंय. ” प्रेमाने स्वागत करत तुम्ही आपली पहिली भेट अगदी खास केली होती. आपल्या देशासाठी केलेल्या योगदानामुळे, तुमच्या कर्तृत्वामुळे आणि विनम्रतेमुळे मी प्रेरित झाले आहे. ओम शांती मिल्खा जी.” असं म्हणत प्रियांकाने तिच्या पोस्टमधून मिल्खा सिंग यांच्या कुटुंबियांचं सांत्वनदेखील केलंय.

मिल्खा सिंग यांनी आपल्या कामगिरीने जगाच्या नकाशावर भारताचं नाव कोरलं. १९५९मध्ये त्यांना पद्मश्री पुरस्काराने सन्मानित करण्यात आले.