अभिनेता गोविंदाचा कुली नंबर १ हा चित्रपट विसरणं कोणत्याची प्रेक्षकाला किंवा चाहत्याला शक्य नाही. या चित्रपटाने ९०चा काळ चांगलाच गाजवला होता. त्यामुळे डेव्हिड धवन यांनी चित्रपटाचा रिमेक करण्याचा निर्णय घेतला. हा चित्रपट आता प्रदर्शनासाठी सज्ज झाला असून नुकतंच त्याचं पोस्टर प्रदर्शित झालं आहे. सोबतच त्याच्या ट्रेलरच्या प्रदर्शनाची तारीखदेखील जाहीर करण्यात आली आहे.

या चित्रपटाच्या निमित्ताने पहिल्यांदा वरुण धवन आणि सारा अली खान ही जोडी एकत्र स्क्रीन शेअर करणार आहे. हे दोघं मुख्य भूमिकेत झळकणार असून त्यांची धम्माल केमिस्ट्री प्रेक्षकांना अनुभवता येणार आहे. प्रदर्शित झालेल्या पोस्टरसोबत या चित्रपटाच्या ट्रेलरची रिलीज डेटदेखील सांगण्यात आली आहे. त्यानुसार, या चित्रपटाचा ट्रेलर २८ नोव्हेंबरला दुपारी १२ वाजता प्रदर्शित होणार आहे.


प्रदर्शित झालेल्या पोस्टरमध्ये सारा पारंपरिक साडीमध्ये दिसून येत आहे. तर वरुण पाच वेगवेगळ्या रुपांमध्ये झळकला आहे. हे पोस्टर साराने शेअर केलं असून “मनोरंजनाची भन्नाट सुरुवात, कुली नंबर वनसोबत पहिली भेट. ट्रेलर पाहण्यासाठी तयार रहा”, असं कॅप्शन तिने या पोस्टरला दिलं आहे.

वाचा : मिर्झापूरमधील ‘हा’ अभिनेता अडकणार विवाहबंधनात; लोकप्रिय अभिनेत्रीसोबत बांधणार साताजन्माची गाठ

दरम्यान, कुली नंबर १ हा चित्रपट १९९५ साली प्रदर्शित झालेल्या कुली नंबर १ चा रिमेक आहे.या चित्रपटात अभिनेता गोविंदा आणि आभिनेत्री करिश्मा कपूर यांनी मुख्य भूमिका साकारली होती. तर या नव्या रिमेकमध्ये वरुण धवन व सारा अली खान झळकणार आहेत. हा चित्रपट २५ डिसेंबर रोजी प्रेक्षकांच्या भेटीला येणार असल्याचं सांगण्यात येत आहे.