सलमान खान सध्या 'दबंग टूर'साठी ऑस्ट्रेलियामध्ये आहे. त्याच्यासोबत 'दंबग' चित्रपटातील नायिका सोनाक्षी सिन्हा आणि डान्स मास्टर प्रभूदेवा देखील आहेत. नुकताच त्यांचा सिडनीमधील रंगारंग कार्यक्रम पार पडला. या कार्यक्रमात तिघांनी धम्माल केल्याचे पाहायला मिळाले. सलमान खानने अधिकृत ट्विटरवरुन कार्यक्रमाचे काही मनमोहक व्हिडिओ आणि फोटो शेअर केले आहेत. या व्हिडिओमध्ये सलमान प्रभूदेवासोबत डान्स करताना दिसतोय. प्रभूदेवासोबतच्या नृत्याला सलमानने 'प्रभू देवासोबत रिअल जलवा ' असे कॅप्शन दिले आहे. या दोघांनी 'वॉंटेड' चित्रपटातील 'जलवा' या गाण्यावर धम्माल केली. त्यांच्या या नृत्याला ऑस्ट्रेलियन प्रेक्षकांनीही कमालीची दाद दिली. प्रभूदेवा सोबतच्या व्हिडिओशिवाय सलमानने सोनाक्षीसोबत नृत्य करतानाचा एक फोटोही शेअर केला आहे. सोनाक्षीसोबतचा क्षण शेअर करताना सलमानने ट्विटवर लिहिलंय की, 'सोनाक्षी सिन्हासोबत स्टेजवर धम्माल केली.' याशिवाय सलमान या कार्यक्रमात त्याच्या 'किक' चित्रपटातील 'जुम्मे की रात.' या गाण्यावर थिरकताना दिसला. सिडनीतील धमाकेदार 'परफॉर्मंस'नंतर दबंग टीम मेलबर्नला पोहचली आहे. या ठिकाणाचेही फोटो आणि व्हिडिओ सोशल मीडियावर व्हायरल होताना दिसते. ट्विटरवर सध्या 'दबंग टूर हॅशटॅग' ट्रेंड करताना दिसतोय. यापूर्वी 'दबंग टूर' न्यूझीलंडमध्ये आयोजित करण्यात आली होती. त्यावेळी बिपाशा बासूची अदाकारी पाहायला मिळाली. तर हॉकॉंगमध्ये रंगलेल्या 'दबंग टूर'मध्ये अक्षय कुमारने वर्णी लावल्याचे दिसले. सलमान खानचा 'ट्युबलाइट' हा चित्रपट ईदच्या मुहूर्तावर प्रदर्शित होणार आहे. या चित्रपटाचा टिझर 'बाहुबली द कन्क्लुजन' चित्रपटाच्या प्रदर्शनादिवशी म्हणजेच २८ एप्रिलला प्रदर्शित करण्यात येणार आहे. यापूर्वी १९ एप्रिलला या चित्रपटाचा पहिले पोस्टर प्रदर्शित करण्यात आले होते. चित्रपटाच्या पोस्टरला कमालीची पसंती मिळाल्याचे पाहायला मिळाले.