बॉलीवूडची सध्याची आघाडीची अभिनेत्री दीपिका पदुकोणच्या हॉलीवूड पदार्पणावर शिक्कामोर्तब झाले आहे. हॉलीवूड अभिनेता व्हीन डिझेलसोबत 'XXX' चित्रपटाच्या सिरीजमध्ये दीपिका झळकणार असून, येत्या फेब्रुवारीत दीपिकाच्या या हॉलीवूडपटाच्या चित्रीकरणाला सुरूवात होणार आहे. खुद्द चित्रपटाचा दिग्दर्शक डी.जे. कुरकओने ट्विटकरून या वृत्ताला दुजोरा दिला आहे. 'XXX' चित्रपटाचे चित्रीकरण लवकरच सुरू करण्यात येणार असून, बॉलीवूड स्टार दीपिका फेब्रुवारीपासून सेटवर चित्रीकरणाला उपस्थित असेल, असे दिग्दर्शकाने ट्विट केले आहे. यापूर्वी दीपिकाचा व्हीन डिझेलसोबतचा फोटो सोशल मीडियावर व्हायरल झाला होता. तेव्हापासून दीपिकाच्या हॉलीवूड पदार्पणाच्या चर्चेने जोर धरला होता. अखेर आज चित्रपटाच्या दिग्दर्शकाच्या ट्विटने शिक्कामोर्तब झाले.
