अ‍ॅक्शन हिरो धर्मेंद्र सध्या सिनेसृष्टीपासून दूर आहेत. परंतु सोशल मीडियावर ते प्रचंड सक्रीय असतात. सोशल मीडियावर व्हायरल होणाऱ्या फोटो आणि व्हिडीओजच्या माध्यमातून ते कायम चर्चेत असतात. यावेळी ते ड्रिप्रेशनच्या व्हिडीओमुळे चर्चेत आहेत. घाबरु नका ते स्वत: नैराश्यात वगैरे गेलेले नाहीत. उलट त्यांनी नैराश्यावर मात कशी करायची याबाबत आपल्या चाहत्यांना माहिती दिली आहे.

धर्मेंद्र यांनी एक व्हिडीओ ट्विट केला आहे. या व्हिडीओमध्ये बैल चारा खात आहेत. तर धर्मेंद्र शांतपणे गरमागरम सूपचा आनंद घेताना दिसत आहेत. “आयुष्य आनंदाने जगा. कुठल्याही गोष्टीचं जास्त टेन्शन घेऊ नका. ड्रिप्रेशनलाच ड्रिप्रेशन द्या” असा संदेश त्यांनी या व्हिडीओद्वारे चाहत्यांना दिला आहे.

बॉलिवूड अभिनेता सुशांत सिंह राजपूत याने गळफास घेऊन आत्महत्या केली. नैराश्यामुळे त्याने आत्महत्या केल्याचं म्हटलं जात आहे. या पार्श्वभूमीवर धर्मेंद्र यांचा हा व्हिडीओ सध्या सोशल मीडियावर सर्वांचेच लक्ष वेधून घेत आहे. काही तासांत शेकडो नेटकऱ्यांनी यावर आपल्या प्रतिक्रिया दिल्या आहेत.