बॉलिवूड अभिनेता- मॉडेल डिनो मोरिया लवकरच डिजिटल विश्वात पदार्पण करताना दिसणार आहे. मधल्या काळात नानाविध प्रकारच्या व्यवसायांमध्ये गुंतवणूक केल्यानंतर हा कलाकार आता परत अभिनयाकडे वळला आहे. तब्बल नऊ वर्षांनंतर तो मनोरंजन विश्वाकडे परतत आहे. 'फिल्म आणि वेब अशा मनोरंजनाच्या दोन्ही माध्यमांमध्ये माझी काम करण्याची तयारी आहे. मोठ्या पडद्यावरील एका प्रोजेक्टच्या कथेवरही सध्या काम सुरु आहे. असे असले तरी वेबविश्वातील ऑफर्स आणि त्यातील भूमिका या अधिक निरनिराळ्या असून जगातील प्रेक्षकांपर्यंत पोहचण्यासाठीचं हे उत्तम व्यासपीठ आहे' असं म्हणत डिनोनं डिजिटल विश्वात पदार्पण करण्याचं प्रमुख कारण सांगितलं. डिनोला वेब सिरीजसाठी अनेक ऑफर्स आल्याचे सूत्रांकडून समजते. काही डिजिटल शोजच्या निर्मात्यांनी त्यांच्या नवीन शोजमधील प्रमुख भूमिकेसाठी डिनोला विचारणा केल्याचे समोर येते. या सगळ्यातून त्याने २-३ कथांची निवड केली आहे ज्यातून त्याचे अभिनयकौशल्य अधिक सिद्ध होईल. या सीरिजमधल्या भूमिकेवर काम करायला डिनोने सुरुवात केली असून फेब्रुवारीपासून शूटिंगला सुरुवात होणार असल्याचे सूत्रांकडून समजते.
