छोट्या पडद्यावरील लोकप्रिय मालिका 'एक हजारों में मेरी बहना है'मध्ये काम करणाऱ्या ज्येष्ठ अभिनेत्री तरला जोशी यांचे निधन झाले आहे. रविवारी त्यांनी अखेरचा श्वास घेतला. त्यांच्या निधनाच्या बातमीने अभिनेत्री निशा शर्माला धक्का बसला आहे. तरला जोशी यांचे रविवारी निधन झाले. मात्र, त्यांच्या निधनाचे कारण अजून समोर आलेले नाही. निया शर्माने सोशल मीडियावर एक पोस्ट शेअर करत ही माहिती दिली आहे. नियाने ही पोस्ट तिच्या इन्स्टाग्राम स्टोरीवरून शेअर केली आहे. या फोटोत निया आणि तिचे सहकलाकार दिसत आहेत. निया तरला जोशी यांच्या जवळ बसलेली आहे. "तरला जी तुम्ही नेहमीच आमच्या बीजी रहाल," असे कॅप्शन देखील नियाने दिले आहे. एवढंच नाही तर नियाने तिच्या एक फॅन पेजची स्टोरी देखील शेअर केली होती. ती पोस्ट शेअर करत "तुमच्या आत्म्याला शांती मिळो, बीजी तुमची आठवण नेहमी येईल," असे निया म्हणाली होती. तरला जोशी या छोट्या पडद्यावरील 'बा' म्हणून ओळखल्या जात होत्या. कारण त्यांनी अनेक मालिकांमध्ये 'बा' ची भूमिका साकारली होती. तरला जोशी यांनी 'साराभाई वर्सेस साराभाई' या मालिकेत काम केले होते.
