ऐतिहासिक स्थळांसाठी ओळखला जाणाऱ्या माल्टा इथं सलमान खानच्या आगामी 'भारत' या चित्रपटाची शूटिंग सुरू आहे. या सेटवरील बरेच फोटो सध्या सोशल मीडियावर व्हायरल होत आहेत. सलमान आणि कतरिनाच्या फोटोने ईदच्या दिवशी सोशल मीडियावर धुमाकूळ घातला होता. त्यानंतर आता सलमानची आई सलमा यांच्यासोबतचा कतरिनाचा फोटो पाहायला मिळत आहे. सलमानची बहीण अर्पिताने हा फोटो शेअर केला आहे. ज्यामध्ये सलमा खान वधूच्या वेशात असलेल्या कतरिनाला प्रेमाने आलिंगन देताना दिसत आहेत. हा फोटो पाहून नेटकऱ्यांनी भरभरून प्रतिक्रिया दिल्या असून अनेकांनी त्यांना 'सासू- सुनेची जोडी' असं म्हटलं आहे. सलमान आणि कतरिनाच्या रिलेशनशिपच्या चर्चा पाहता नेटकऱ्यांनी अशा प्रतिक्रिया दिल्या आहेत. स्वत: अर्पिताने यातल्या एका कमेंटवर काय प्रतिक्रिया दिली आहे ते पाहा.. वाचा : आर. के. स्टुडिओच्या लोगोमागची रंजक कथा तुम्हाला माहित आहे का? काही वेळाने अर्पिताने हा फोटो डिलीट केला पण तोपर्यंत तो व्हायरल झाला होता. माल्टा येथे सलमानसोबत आई सलमा खान आणि बहीण अलविरा खान दोघीही गेल्या आहेत. आईसोबतचे अनेक व्हिडिओ सलमानने आपल्या सोशल अकाऊंटवर शेअर केले आहेत. 'भारत' या चित्रपटात सलमान आणि कतरिनासोबत दिशा पटानी, तब्बू, नोरा फतेही यांच्या महत्त्वपूर्ण भूमिका आहेत. पुढच्या वर्षी ईदच्या मुहूर्तावर हा चित्रपट प्रदर्शित होणार आहे.
