उमेश कुलकर्णी दिग्दर्शित आणि अरभाट फिल्म्स निर्मित ‘हायवे’ या मराठी चित्रपटाला १६ व्या न्यूयॉर्क आंतरराष्ट्रीय चित्रपट महोत्सवात उत्कृष्ट चित्रपट आणि दिग्दर्शनाचा पुरस्कार मिळाला आहे. इंडो अमेरिकन आर्ट्स कौन्सिलतर्फे ७ ते १४ मे या कालावधीत न्यूयॉर्क येथे या महोत्सवाचे आयोजन करण्यात आले होते. स्पर्धेत एकूण चाळीस चित्रपट सहभागी झाले होते. भारतीय व अमेरिकन चित्रपटसृष्टीतील तेरा जणांनी परीक्षक म्हणून काम पाहिले. हे दोन्ही पुरस्कार सईद मिर्झा व सय्यद अकबरुद्दीन आणि सलमान रश्दी यांच्या हस्ते प्रदान करण्यात आले. वळू, विहीर आणि देऊळ या चित्रपटांनंतर जागतिक स्तरावर दखल घेण्यात आलेला दिग्दर्शक उमेश कुलकर्णी यांचा हा चौथा चित्रपट आहे.
