अभिनेते नाना पाटेकर यांच्यावर गैरवर्तणूकीचे आरोप केल्यानंतर आता तनुश्री दत्ता हिनं दिग्दर्शक विवेक अग्निहोत्रीवरदेखील सेटवर गैरवर्तणूक केल्याचा आरोप केला आहे. २००५ मध्ये 'चॉकलेट : डिप डार्क सिक्रेट' चित्रिकरणावेळी त्यांनी आपल्याशी गैरवर्तणूक केल्याचं तिनं म्हटलं आहे. मात्र यावेळी सुनील शेट्टी आणि इरफान खान आपल्या पाठीशी उभे राहिले असं म्हणत तिनं पुन्हा एकदा नव्या वादाला तोंड फोडलं आहे. 'चॉकलेट.' या चित्रपटाच्या चित्रिकरणादरम्यान कोणतीही कल्पना न देता मला संपूर्ण कपडे काढून डान्स करण्यास दिग्दर्शकानं (विवेक अग्निहोत्रीनं )सांगितलं. या दृश्यात मी नव्हते तरीही मी अशाप्रकारचा टेक द्यावा अशी सूचना त्यांनी मला केली पण सुदैवानं सुनील शेट्टी आणि इरफान खान त्यावेळी माझ्याबाजूनं उभं राहिले' असं ती डीएनए या वृत्तपत्राला दिलेल्या मुलाखतीत म्हणाली. तनुश्री दत्ता- नाना पाटेकर यांच्यात नेमकं काय घडलं? वाचा प्रत्यक्षदर्शीचा खुलासा याआधी तिनं नाना पाटेकर यांच्यावर गैरवर्तन केल्याचा आरोप केला होता. नाना सारख्या महिलांशी असभ्य वर्तन करणाऱ्या लोकांसोबत काम करणं या क्षेत्रातल्या मोठ्या लोकांनी थांबवलं पाहिजे. पण रजनीकांत, अक्षय कुमार यांसारखे कलाकार त्यांच्यासोबत काम करतात हे असंच सुरू राहिलं तर भारतात 'metoo' सारखी मोहिम कधीही यशस्वी होणार नाही असंही ती एका मुलाखतीत म्हणाली. या प्रकरणावर 'कोणी काय बोलायचं हे आपण कसं ठरवणार, कोणी काहीही म्हटलं तरी मला जे आयुष्यात करायचं आहे तेच मी करणार' अशी प्रतिक्रिया नाना पाटेकर यांनी 'टाइम्स नाऊ' या वृत्तवाहिनीशी बोलताना दिली आहे.
