बॉलिवूड अभिनेता सुशांत सिंह राजपूत याने गळफास घेऊन आत्महत्या केली. तो केवळ ३४ वर्षांचा होता. सुशांतच्या आत्महत्येसाठी बॉलिवूडमधील घराणेशाहीला जबाबदार ठरवले जात आहे. तसेच घराणेशाहीचे कर्ताधर्ता म्हणून करण जौहर व सलमान खान यांच्यावर कायदेशीर कारवाई करावी अशीही मागणी केली जात आहे. दरम्यान आता अभिनेत्री जिया खानच्या आईनेही सलमान खानवर निशाणा साधला आहे. जियाची केस बंद करण्यासाठी सलमान खानने प्रयत्न केले होते, असा धक्कादायक आरोप तिने केला आहे.

जियाची आई राबिया अमीन यांनी सुशांतच्या आत्महत्येच्या पार्श्वभूमीवर एक मुलाखत दिली होती. या मुलाखतीत त्यांनी बॉलिवूडमधील घराणेशाहीवर टीका केली. शिवाय सलमान खानवरही गंभीर आरोप केले. २०१३ साली अभिनेत्री जिया खानने आत्महत्या केली होती. जियाला आत्महत्येस प्रवृत्त केल्याच्या संशयावरुन अभिनेता सुरज पांचोलीला अटक करण्यात आली होती. परंतु त्याला सोडवण्यासाठी सलमान खानने प्रयत्न केले होते असा आरोप जियाची आई राबिया अमीन यांनी केला आहे.

“सुशांतबाबत जी घटना घडली त्यामुळे मला २०१५ची आठवण झाली. तेव्हा मी माझ्या मुलीच्या केसच्या संदर्भात एका सीबीआय अधिकाऱ्याची भेट घेतली होती. तेव्हा त्यांनी सांगितलं, की सलमान मला रोज फोन करुन सुरजला वाचवण्यासाठी विनंती करतोय. यासाठी तो पैसे देखील द्यायला तयार आहे. बॉलिवूडमधील हा बुलिंगचा प्रकार आता बंद व्हायलाच हवा.” असा अनुभव राबिया अमीन यांनी सांगितला आहे. हा व्हिडीओ सध्या सोशल मीडियावर जोरदार चर्चेत आहे.