बॉलिवूडची 'क्वीन' अर्थात अभिनेत्री कंगना रणौतसाठी तिच्या आईने पूजा केली आहे. या पूजेचा व्हिडीओ सोशल मीडियावर पोस्ट करत कंगनाने याबद्दलची माहिती दिली. कंगनाच्या सुरक्षेसाठी महामृत्यूंजय मंत्राचा जप तिच्या घरी करण्यात आला. 'माझी आई माझ्या सुरक्षेविषयी चिंतेत असते. त्यामुळे तिने एक लाख पंधरा हजार महामृत्यूंजय मंत्राचा जप केला. ही पूजा आज संपन्न झाली. मी माझ्या कुटुंबीयांची आभारी आहे', असं कंगनाने व्हिडीओ पोस्ट करत म्हटलं. या व्हिडीओत कंगना पूजा करताना दिसत आहे. तिच्यासोबत तिची आई आणि तिचा छोटा भाचासुद्धा पूजेत मग्न आहेत. गेल्या काही दिवसांपासून कंगना फार चर्चेत आहे. अभिनेता सुशांत सिंह राजपूतच्या मृत्यू प्रकरणानंतर तिने अनेकांवर आरोप केले. बॉलिवूडमधल्या घराणेशाहीचा वाद सुरू झाला आणि त्यानंतर तापसी पन्नू, स्वरा भास्कर, रिचा चड्ढा यांच्याशीसुद्धा कंगनाची शाब्दिक बाचाबाची झाली. काही दिवसांपूर्वी कंगनाच्या मनाली इथल्या राहत्या घराबाहेर काही अज्ञात लोकांनी गोळीबारसुद्धा केला होता.
