बहुरंगी, बहुढंगी कलाकार आणि महाराष्ट्राचे लाडके लेखक पु.लं. देशपांडे यांच्या जीवनावर आधारित 'भाई : व्यक्ती की वल्ली' हा चित्रपट पुढील वर्षी प्रेक्षकांच्या भेटीला येत आहे. या चित्रपटातील पहिलं गाणं नुकतंच प्रदर्शित करण्यात आलं आहे. 'कानडा राजा पंढरी'चा हे गाणं नव्यानं 'भाई : व्यक्ती की वल्ली'मध्ये पाहायला मिळणार आहे. भाईंसमवेत कुमार गंधर्व, भीमसेन जोशी आणि वसंतराव देशपांडे यांच्या मैफलीत सुरू झालेला विठ्ठलाचा गजर तितकाच श्रोत्यांना मंत्रमुग्ध करणारा आहे. राहुल देशपांडे, जयतीर्थ मेवुंडी, भुवनेश कोमकली यांच्या सुरांची जादू या गाण्यात पाहायला मिळत आहे. महेश मांजरेकर दिग्दर्शित या चित्रपटात अभिनेता सागर देशमुख पु.लंच्या भूमिकेत आहे. या चित्रपटाच्या निमित्तानं पु.लंच्या जीवनातील अनेक गोष्टी प्रेक्षकांना पाहायला मिळणार आहेत. महाराष्ट्राला आपल्या लेखणीतून हसवणाऱ्या पु.लं.चं आयुष्य नेमकं कसं होतं हे या चित्रपटातून पाहायला मिळणार आहे. विशेष म्हणजे हा चित्रपट दोन भागात प्रदर्शित होणार आहे. या चित्रपटाचा पूर्वार्ध ४ जानेवारीला तर उत्तरार्ध ८ फेब्रुवारीला प्रदर्शित होणार आहे.