झी मराठी वाहिनीवर ‘डान्सिंग क्वीन’ या रिअॅलिटी शोचं नवीन पर्व प्रेक्षकांच्या भेटीला आलं आहे. ‘डान्सिंग क्वीन- साईज लार्ज फुल चार्ज’ असा यंदाच्या सिझनचा हटके थीम आहे. या शोमध्ये १५ वर्षे व त्यावरील वयोगटाच्या मुली व महिलांनी सहभाग घेतला आहे. त्यांचं वजन ७० किंवा त्याहून अधिक असलं पाहिजे, हीच एक अट आहे. या आठवड्यात डान्सिंग क्वीनच्या मंचावर 'माझ्या नवऱ्याची बायको' या मालिकेतील राधिका आणि गुरुनाथ अवतरणार आहेत. प्रेक्षकांना अभिजीत खांडकेकर व अनिता दाते यांचा अप्रतिम डान्ससुद्धा पाहायला मिळणार आहे. नाट्यलेखक, दिग्दर्शक व अभिनेता म्हणून प्रसिद्ध असलेला अद्वैत दादरकर या कार्यक्रमाचं सूत्रसंचालन करत आहे. तर या स्पर्धेत नृत्यदिग्दर्शन ओंकार शिंदे करत आहे. मराठी चित्रपटसृष्टीची अप्सरा अर्थात सोनाली कुलकर्णी व आरजे मलिष्का या शोचे परीक्षक आहेत. हा आगळावेगळा शो गुरुवार ते शनिवारी रात्री ९.३० वाजता झी मराठी वाहिनीवर प्रसारित होत आहे.
