कंगना रणौत आणि हृतिक रोशन यांच्यातील वाद हा काही बॉलिवूडला नवा नाही. हा वाद दोन वर्ष जुना असला तरी आपल्या अनेक मुलाखतीतून कंगना हृतिकवर शाब्दिक वार करायची संधी सोडत नाही. या आठवड्यात कंगनाचा 'मणिकर्णिका' हा चित्रपट प्रदर्शित होत आहे. काही दिवसांपूर्वी या चित्रपटाचा ट्रेलर सोशल मीडियावर प्रदर्शित करण्यात आला. या ट्रेलरमधील एक संवाद हा हृतिकच्या 'मोहेंजो दारो' चित्रपटातील संवादाशी साधर्म्य असणारा होता. योगायोग म्हणजे दोन्ही चित्रपटांचे ट्रेलर याच संवादावर संपत होते. त्यामुळे कंगानाच्या 'मणिकर्णिका'मध्ये हृतिकच्या चित्रपटातील संवाद कॉपी केल्याची चर्चा सोशल मीडियावर खूपच रंगली होती. या सगळ्या चर्चांवर कंगनानं तिच्या स्टाईलनं सडेतोड उत्तर दिलं आहे. संवाद कॉपी करण्याचा संबध येतोच कुठे मोहेंजो दारो पाहिलाय कोणी? असा टोमणा कंगनानं मारला आहे. काय आहे संवाद 'झांसी आप भी चाहते हैं और हम भी, फर्क सिर्फ इतना है कि आपको राज करना है और मुझे अपनों की सेवा' असं वाक्य 'मणिकर्णिका'च्या ट्रेलरमध्ये कंगना म्हणताना दिसत आहे. तर मोहेंजो दारो 'अंतर है महम तू मोहेंजो दारो पे राज करना चाहता है और मे सेवा' हे वाक्य हृतिकच्या तोंडी आहे. या दोन्ही वाक्यात बरंच साधर्म्य असल्याचं नेटकऱ्यांचं म्हणणं आहे. मात्र सोशल मीडियावर सुरू असलेल्या चर्चेला सडेतोड उत्तर देत संवाद कॉपी न केल्याचं कंगनानं मणिकर्णिकाच्या प्रमोशनदरम्यान स्पष्ट केलं आहे. काय म्हणाले दिग्दर्शक 'हे वाक्य कोणत्याही राजकारण्याच्या तोंडून तुम्हाला सहज ऐकायला मिळेल त्यामुळे ते कोणत्याही चित्रपटामधून कॉपी करण्यात आलेले नाही', असं दिग्दर्शक कमल जैन यांनी स्पष्ट केलं आहे.
