पवित्र रिश्ता या हिंदी मालिकेतून घराघरात पोहोचलेली टीव्ही अभिनेत्री अंकिता लोखंडे आता मणिकर्णिका- द क्वीन ऑफ झांसी सिनेमातून सिनेसृष्टीत पदार्पण करत आहे. या सिनेमात कंगना झाशीची राणी लक्ष्मी बाईची भूमिका साकारणार आहे. तर अंकिता झलकारी बाईच्या व्यक्तिरेखेत दिसेल. काही दिवसांपूर्वी कंगनाचे सेटवरचे अनेक फोटो व्हायरल झाले होते. प्रेक्षकांना कंगनाचा या सिनेमातील लूक तुफान आवडला. आता अंकिताच्या लूकचा फोटोही सोशल मीडियावर व्हायरल झाला आहे. या सिनेमात अंकिताने झलकारी बाईची व्यक्तिरेखा साकारली आहे. व्हायरल झालेल्या फोटोमध्ये अंकिताने हिरव्या आणि लाल रंगाची खणाची साडी नेसली आहे. या फोटोत तिची नजर खाली असून तिच्या मागे झाडंही दिसत आहेत. तर तिच्या एका बाजूला लॅम्प दिसत आहेत. तिचा लूक आणि इतर साहित्य पाहून हा मणिकर्णिका सिनेमाच्या सेटवरीलच फोटो आहे असे म्हटले तर चुकीचे ठरणार नाही. अंकिताच्या फोटोआधी कंगनाचा झाशीच्या राणीचा लूक लिक झाला होता. या फोटोमध्ये कंगनाने पांढऱ्या रंगाचा ड्रेस घातला होता. या ड्रेससोबत तिने पांढऱ्या रंगाची पगडीही घातली होती. यानंतर कंगनाने किरमीजी रंगाची साडी नेसलेला फोटो व्हायरल झाला होता. या फोटोत कंगनाने तिचे केस बांधलेले आहेत आणि केसात गुलाबाची फुलं माळली आहेत. या फोटोत कंगनाने खूप सारे दागिनेही घातले आहेत.