मराठी कलाविश्वातील लोकप्रिय अभिनेता म्हणजे यशोमान आपटे. कमी कालावधीत लोकप्रिय झालेल्या या अभिनेत्याची तरुणींमध्ये विशेष क्रेझ आहे. त्यामुळे त्याच्याविषयी प्रत्येक अपडेट जाणून घेण्यासाठी चाहते उत्सुक असतात. अनेक गाजलेल्या मालिकांमध्ये काम केलेला यशोमान लवकरच एका म्युझिक अल्बममध्ये झळकणार आहे. 'नको रुसवा नको दुरावा, सतत वाटे तू इथे जवळी रहा' या नव्या म्युझिक अल्बममध्ये यशोमान झळकणार असून अभिनेत्री ज्ञानदा रामतीर्थकर त्याच्यासोबत स्क्रीन शेअर करणार आहे. विशेष म्हणजे या अल्बममध्ये यशोमानचा रोमॅण्टिक अंदाज प्रेक्षकांना पाहायला मिळणार आहे. या म्युझिक अल्बमचं दिग्दर्शन आणि नृत्यदिग्दर्शन कृतिक मझीर यांनी केलं आहे. तर निर्मिती साईनाथ राजाध्यक्ष यांनी केली आहे. दरम्यान, यशोमानचा हा पहिलाच म्युझिक अल्बम असून यापूर्वी तो काही मालिकांमध्ये झळकला आहे. यात त्याच्या 'फुलपाखरु', 'श्रीमंता घरची सून' या मालिका विशेष गाजल्याचं पाहायला मिळतं.