आपल्या गोड आवाजाने कानसेनांना मंत्रमुग्ध करणारी गायिका म्हणजे आर्या आंबेकर. झी मराठीवरील ‘सारेगमप लिटिल चॅम्प्स’ या रिअॅलिटी शोच्या माध्यमातून प्रेक्षकांच्या भेटीला आलेली आर्या आज अनेकांच्या गळ्यातलं ताईत झाली आहे. गायनक्षेत्राप्रमाणेच आर्याने अभिनय क्षेत्रातदेखील तिचं नशीब आजमावलं आहे. त्यामुळे आज तिचा अफाट मोठा चाहतावर्ग असल्याचं पाहायला मिळतं. सोशल मीडियावर सक्रीय असलेल्या आर्याने एक खास फोटो शेअर करत चाहत्यांना दिवाळीच्या शुभेच्छा दिल्या आहेत. सोबतच तिने तिच्या आईप्रती असलेलं प्रेमदेखील व्यक्त केलं आहे. आर्याने दिवाळीनिमित्त एक फोटो शेअर केला आहे. या फोटोमध्ये तिने निळ्या रंगाची साडी नेसली असून हातात पणती धरली आहे. विशेष म्हणजे तिने नेसलेली साडी तिच्या आईची आहे. तर तिचा हा सुंदर फोटो तिच्या वडिलांनी कॅमेरात कैद केला आहे. हा फोटो शेअर करत तिने आई-वडिलांविषयी प्रेम व्यक्त केलं आहे. View this post on Instagram A post shared by Aarya Ambekar (@ambekaraarya) दरम्यान, आर्या आंबेकर हे नाव आता मराठी कलाविश्वाला नवीन राहिलेलं नाही. उत्तम आवाजा आणि अभिनय यांच्या जोरावर आज ती लोकप्रिय सेलिब्रिटी आहे. झी मराठीवर २००८ मध्ये रंगलेल्या ‘सारेगमप लिटिल चॅम्प्स’ या रिअॅलिटी शोने आर्या आंबेकरला खरी ओळख मिळवून दिली.