छोट्या पडद्यावरील 'माझा होशील ना' या मालिकेत सध्या अनेक रंगतदार वळणं पाहायला मिळत आहेत. सई आणि आदित्य यांच्या नात्यात बरीच उलथापालथ झाली आहे. त्यामुळे या परिस्थितीचा मेघना फायदा घेण्याचा प्रयत्न करत आहे. विशेष म्हणजे सध्याच्या परिस्थितीचा फायदा घेत मेघनाने थेट आदित्यशी साखरपुडा करणाऱ्याचा घाट घातला आहे. परंतु, हा साखरपुडा मेघना स्वत:च मोडणार असल्याचं म्हटलं जात आहे. सई आणि आदित्य दोघांच्याही मनात एकमेकांविषयी प्रेम आहे. मात्र, त्यांची ही प्रेमभावना ते जाणूनबुजून एकमेकांपासून लपवत आहेत. एकीकडे आदित्य आणि मेघनाचा साखरपुडा होणार असल्यामुळे सई नाराज आहे. तर आदित्यदेखील मनाविरुद्ध हा साखरपुडा करण्यास तयार झाला आहे. आदित्यला साखरपुडा करण्याची इच्छा नसल्याचं मेघनाला पूर्णपणे ठावूक आहे. मात्र, तरीदेखील ती अट्टाहासाने हा साखरपुडा करण्याचा निर्णय घेते. विशेष म्हणजे या कथेत अनपेक्षितपणे एक ट्विस्ट घडणार आहे. साखरपुड्यासाठी हट्ट करणारी मेघनाच हा साखरपुडा मोडणार असल्याचं दिसून येत आहे. खरं तर मेघना हा निर्णय का घेते, ती खरंच हा साखरपुडा मोडणार का की ही तिची नवीन खेळी असणार आहे हे पाहणं सध्या औत्सुक्याचं ठरणार आहे.
