तरुणाईचा फिटनेस आदर्श म्हणून कायम अभिनेता मिलिंद सोमणची तरुणांमध्ये चर्चा असते. मिलिंद बऱ्याच वेळा सोशल मीडियावर त्याच्या वर्कआऊटचे व्हिडीओ, फोटो शेअर करत असतो.त्यामुळे चाहत्यांमध्ये तो कायम चर्चेत असतो. मात्र यावेळी तो अन्य एका कारणामुळे चर्चेत आला आहे. मिलिंदने आता वर्कआऊटचा फोटो शेअर करण्याऐवजी चक्क गार्डनिंग करतानाचा फोटो शेअर केला आहे. त्यामुळे त्याला वर्कआऊटसोबतच गार्डनिंगमध्येही रमायला आवडत असल्याचं दिसून येत आहे.

मिलिंदने इन्स्टाग्रामवर एक पोस्ट शेअर केली आहे. या पोस्टमध्ये त्याने घरच्या घरी काही फळभाज्यांची शेती केली आहे. यात त्याने काकडी आणि शिरोळी हातात घेऊन फोटो शेअर केला आहे.

“अखेर एक लांब दाढी असलेला शेतकरी, अंकिताची इच्छा होती तसाच. स्वत:च्या हाताने उगवलेल्या भाज्या खाण्यात खरंच एक आनंद आहे. लॉकडाउनमध्ये एक लहानसं ग्रीन हाऊस किंवा भाज्यांचं घरं”, असं कॅप्शन मिलिंदने या फोटोला दिलं आहे.

दरम्यान, मिलिंद सोशल मीडियावर सक्रीय असून अनेक वेळा तो फॅमिलीसोबतचे, वर्कआऊटचे फोटो शेअर करत असतो. त्याच्याप्रमाणेच त्याची पत्नी अंकितादेखील फिटनेस फ्रिक आहे. अलिकडेच तिने मिलिंदचा वर्कआऊट करतानाचा एक फोटो शेअर केला होता. यात अंकिताला पाठीवर बसवून मिलिंद पुशअप्स करत होता. हा फोटो सोशल मीडियावर बराच चर्चिला गेला होता.