‘तुझ माझं ब्रेक अप’ फेम अभिनेत्री केतकी चितळे हीने मुख्यमंत्री देवेंद्र फडणवीस यांची भेट घेतली होती. दरम्यान हिंदी भाषेत बोलल्याने तिला सोशल मीडियावरच्या नेटकऱ्यांनी चांगलेच ट्रोल केले. अश्लील भाषेत करण्यात आलेल्या ट्रोलिंगला केतकी चितळेने जशास तसे उत्तर दिले होते. आज याच प्रकरणी केतकी चितळे मनसे अध्यक्ष राज ठाकरे यांचीही भेट घेतली. "सोशल मीडियावरील ट्रोल्सना तू ज्याप्रकारे रोखठोक उत्तर दिलंस, त्यामुळे अनेक दबलेल्या आवाजांना तू व्यक्त होण्यासाठीची हिंमत दिलीस, त्याबद्दल तुझं अभिनंदन" अशा शब्दात महाराष्ट्र नवनिर्माण सेनेचे अध्यक्ष राज ठाकरे यांनी अभिनेत्री केतकी चितळेचं अभिनंदन केलं. केतकी चितळेवर काही दिवसांपूर्वी सोशल मीडियावरील ट्रोल्सनी अत्यंत घाणेरड्या शब्दात टीका केली होती. त्या टीकेला केतकीने एका व्हिडिओ पोस्टद्वारे अत्यंत रोखठोक उत्तर दिलं. महाराष्ट्र नवनिर्माण सेनेच्या सरचिटणीस शालिनी जितेंद्र ठाकरे यांच्यासोबत केतकी चितळे आज सकाळी राज ठाकरे यांच्या कृष्णकुंज निवासस्थानी आली होती. "राज ठाकरे यांनी माझं अभिनंदन करण्यासाठी मला बोलावलं होतं", अशी प्रतिक्रिया केतकीने प्रसारमाध्यमांशी बोलताना दिली. "सोशल मीडियावरील महिलांशी मतभेद झाल्यावर काहीजण अत्यंत घाणेरड्या शब्दांत महिलांवर टीका करतात. दुर्दैवाने, आजही महिलांच्या मतांचा, तसंच त्यांच्या वैयक्तिक प्रतिष्ठेचा आदर करण्याची वृत्ती समाजात, विशेषतः सोशल मीडियात दिसत नाही. महिलांवर बिभत्स शब्दात टीका करणाऱ्यांना केतकीने जे रोखठोक उत्तर दिले आहे, ते निश्चितच कौतुकास्पद आहे" असं मत मनसेच्या सरचिटणीस शालिनी ठाकरे यांनी याप्रसंगी व्यक्त केले.
