मराठी चित्रपटसृष्टीत नुकतंच पदार्पण केलेला नवोदित अभिनेता सुमेध मुदगलकर आणि अभिनेत्री संस्कृती बालगुडे लवकरच एका म्युझिक अल्बममध्ये झळकणार आहेत. या अल्बमची निर्मिती समीर परब आणि संतोष परब यांनी केली असून दिग्दर्शन ओमकार माने,जयपाल वाधवानी यांनी केली आहे. 'बेखबर कशी तू' असं या म्युझिक अल्बमच नाव असून तो १८ नोव्हेंबर रोजी प्रेक्षकांच्या भेटीला येणार आहे. या गाण्याचे बोल गीतकार आशिष देशमुख आणि व्यान यांनी लिहीले असून व्यान यांनीच संगीतबद्ध केलं आहे. विशेष म्हणजे या गाण्याला रॉकस्टर रोहित राऊतचा आवाज लाभला आहे. दरम्यान, या म्युझिक अल्बमचं डेहराडून, हृषिकेश या सारख्या निसर्गरम्य ठिकाणी चित्रीकरण करण्यात आलं आहे. 'या म्युझिक अल्बमला प्रस्तुत करताना मला फार आनंद होत आहे. यापूर्वी कधीही अनुभूती न घेतलेली व्हिज्युअल ट्रिट, लोकेशन्स, कॉस्च्युम्स तुम्हांला या अल्बमच्या माध्यमातून पाहता येणार आहे. त्यामुळे हा अल्बम प्रेक्षकांना नक्की आवडेल अशी मला खात्री आहे', असं ‘व्हिडियो पॅलेस’चे नानुभाई जयसिंघानी म्हणाले.
