नाना पाटेकर यांची मुख्य भूमिका असलेल्या 'आपला मानूस' या चित्रपटाचा टीझर नुकताच प्रदर्शित झाला आहे. सतीश राजवाडे दिग्दर्शित या चित्रपटाचा टीझर अजय देवगणने त्याच्या ट्विटर अकाऊंटवर शेअर केला आहे. नानांसोबत सुमित राघवन, इरावती हर्षे यामध्ये झळकणार आहेत. टीझरच्या सुरुवातीलाच एक व्यक्ती इमारतीवरून उडी मारताना पाहायला मिळतो. त्याच व्यक्तीच्या मृत्यूची चौकशी नाना करत असतात. नाना पाटेकर क्राईम ब्रांचमधील वरिष्ठ पोलीस निरीक्षक मारूती नागरगोजे ही भूमिका साकारत आहेत. 'आपल्याला जमेल तेवढाच चांगुलपणा दाखवावा, आपण काय गांधी नाही' यांसारखे दमदार संवाद टीझरमध्ये आहेत. नवऱ्याच्या वडिलांसोबत राहणाऱ्या, शहरी जीवनशैलीच्या दबावाचा सामना करणाऱ्या आणि नातेसंबंधांची गुंतागुंत हाताळणाऱ्या एका तरुण दाम्पत्याची कथा या चित्रपटातून मांडण्यात आली आहे. काही दिवसांपूर्वीच अजयने या चित्रपटाचा फर्स्ट लूक शेअर केला होता. पोस्टरमध्ये एका पावसाळी रात्री नाना पाटेकर बाईक चालवताना दिसत आहेत. पोस्टरवरील 'हा सैतान बाटलीत मावनार नाय' ही टॅगलाईनसुद्धा लक्षवेधी ठरली. अजय देवगण या चित्रपटाचा निर्मात असून तो यामध्ये पाहुण्या कलाकाराच्या भुमिकेत पाहायला मिळणार आहे. हा चित्रपट ९ फेब्रुवारी रोजी प्रदर्शत होणार आहे.