'रागिनी एमएमएस २', 'अलोन' आणि '१९२० एविल रिटर्न्स' यांसारख्या भयपटांचे दिग्दर्शक भूषण पटेल आणखी एक भटपय प्रेक्षकांच्या भेटीला घेऊन येत आहेत. 'अमावस' असं या चित्रपटाचं नाव असून हॅलोविनला त्याचा फर्स्ट लूक प्रदर्शित झाला होता. त्यानंतर आता या भयपटाचा टीझर प्रदर्शित झाला आहे. यामध्ये नरगिस फाख्री, सचिन जोशी, विवान भटेना, नवनीत कौर ढिल्लन, मोना सिंग आणि अली असगर यांच्या भूमिका आहेत. 'इसबार भी वो अंधेरा छाएगा अपनी पुरी ताकदों के साथ,' असे काही संवाद या टीझरमध्ये आहेत. अमावस्येच्या रात्रीची ही कथा आहे आणि हा टीझर तुमच्याही काळजाचा ठोका चुकवेल. या भयपटाची संपूर्ण शूटिंग लंडनमध्ये ४० दिवसांत झाली. ११ जानेवारी २०१९ रोजी हा चित्रपट प्रेक्षकांच्या भेटीला येणार आहे. रहस्यमय, गूढ, थरारपट, भयपट म्हटले की ज्या अपेक्षा प्रेक्षक करतो त्या नेहमीच पूर्ण होतात असे नाही. 'रागिनी एमएमएस २', 'अलोन' हे चित्रपट बॉक्स ऑफीसवर जेमतेम चालले. त्या तुलनेत 'अमावस' बॉक्स ऑफीसवर हिट ठरेल का हे पाहणं औत्सुक्याचं ठरेल.