अभिनेता शाहरुख खानच्या आगामी 'झीरो' या चित्रपटाविरोधात मुंबई हायकोर्टात याचिका दाखल करण्यात आली आहे. या चित्रपटाच्या पोस्टर आणि ट्रेलरवर आक्षेप घेत शिखांच्या भावना दुखावल्याचा आरोप अमृतपाल सिंग खालसा नामक वकिलाने याचिकेत केला आहे. काही दिवसांपूर्वी या चित्रपटाचं पोस्टर आणि ट्रेलर प्रदर्शित करण्यात आलं. बनियानमध्ये असलेल्या शाहरुखच्या गळ्यात नोटांची माळ आणि शीखांकडून परिधान करण्यात येणारं कृपाण या पोस्टर आणि ट्रेलरमध्ये दिसते. कृपाण हे शीखांचं धार्मिक चिन्ह असल्यामुळे या पोस्टरमध्ये त्याचा गैरवापर केल्याचा दावा खालसा यांनी याचिकेत केला आहे. तसंच याविरोधात शाहरुखसह निर्माते गौरी खान, करुणा बडवाल, दिग्दर्शक आनंद एल राय, रेड चिलीज एंटरटेन्मेंट आणि सेन्सॉर बोर्डावर कारवाईचे निर्देश द्यावेत, अशी विनंती करण्यात आली आहे. या याचिकेवर १९ नोव्हेंबरला सुनावणी होण्याची शक्यता आहे. वाचा : 'ठग्स ऑफ हिंदोस्तान'चे पैसे वसूल करून देण्यासाठी 'वहाण'ची भन्नाट ऑफर शाहरुखचा 'झीरो' चित्रपट प्रदर्शनापूर्वीच अडचणीत सापडला आहे. याआधी पंजाबमधील अकाली दलाचे आमदार मंजिदर सिंह सिरसा यांनी शाहरुख खानसह चित्रपटातील अन्य व्यक्तींविरोधात तक्रार दाखल केली होती. यावर शाहरुख कसा तोडगा काढणार हे पाहणं महत्त्वाचं ठरणार आहे.
