देसी गर्ल ते क्वांटिको गर्ल असा प्रवास करणारी अभिनेत्री म्हणजे प्रियांका चोप्रा. अमेरिकन गायक निक जोनाससोबत लग्न केल्यानंतर प्रियांका विदेशात स्थायिक झाली आहे. विशेष म्हणजे आता प्रियांकाचा हॉलिवूडमधील वावर वाढला असून ती लवकरच एका नव्या हॉलिवूड चित्रपटात झळकणार आहे. याविषयी एक पोस्ट शेअर करत तिने ही माहिती दिली.

प्रियांका लवकरच ‘टेक्स्ट फॉर यू’ या चित्रपटात झळकणार असून त्याचं दिग्दर्शन जिम स्ट्रॉज करणार आहेत. उत्तम कलाकारांसोबत चित्रपटात काम करण्याची मनापासून उत्सुकता आहे. जिम स्ट्रॉस, सॅम ह्यूहान, सेलीन डायऑन. ही संधी फार मोठी आहे. चला सुरुवात करुयात, अशी पोस्ट प्रियांकाने केली आहे.

दरम्यान, ‘टेक्स्ट फॉर यू’ या चित्रपटाची कथा ‘एसएमएस फर दिच’वर आधारित आहे. या चित्रपटाची कथा एका महिलेभोवती फिरत असून तिच्या पतीच्या मृत्यूनंतर त्याच्याच नंबरवरुन तिला सतत काही मेसेज येतात. त्यानंतर हे मेसेज कोण करतं हे चित्रपटातून उलगडण्यात येणार आहे.