कंगना रणौतची बहिण रंगोलीने अभिनेत्री तापसी पन्नूला स्वस्त कॉपी असे म्हणत हिणवले. काही लोक कंगनाची कॉपी करून आपले दुकान चालवतात. कंगनाला सुधारण्याची गरज आहे असं तापसीने म्हटलं होतं मात्र तापसीने कंगनाची ‘सस्ती कॉपी’ होणं टाळलं पाहिजे असा खोचक सल्ला रंगोलीने दिला आहे.यानंतर तापसीनेही तुझ्याकडून हेच उत्तर अपेक्षित होतं असं म्हणत उत्तर दिलंय. या दोघींच्या ट्विटरवॉरमध्ये उडी घेत दिग्दर्शक अनुराग कश्यपने रंगोलीला झापले आहे.

ट्विटरवरच्या अशाच काही वक्तव्यामुळे कंगनाची बहिण रंगोली चर्चेत असते. बुधवारी कंगनाच्या ‘जजमेंटल है क्या?’ या सिनेमाचा ट्रेलर रिलिज झाला. इतर फॅन्सप्रमाणे तो अभिनेत्री तापसी पनूनेही पाहिला. तापसीने या ट्रेलचे कौतुक करत हे खूपच कुल आहे, यांच्याकडून नेहमीच जास्त अपेक्षा होत्या आणि हा सिनेमा पैसा वसुल असेल असे ट्विट केले. मात्र या ट्विटला कंगनाच्या बहिणीने उत्तर दिले आहे. रंगोलीने तापसीवर टीका करताना तिला कंगनाची ‘सस्ती कॉपी’ असे म्हटले आहे.

रंगोलीने ही टीका केल्यानंतर दिग्दर्शक अनुराग कश्यप तापसीच्या मदतीला धावला आहे. हे जरा अति होते आहे आणि तू जे काही बोलते आहेस ते निराशा करणारे आहे या आशयाचे ट्विट अनुराग कश्यपने केले आहे. तुम्हा दोघींना मी काय सांगणार? पण एखाद्या सिनेमाच्या ट्रेलरचे कौतुक केल्यावर अशा प्रकारे बोलणे योग्य नाही असे अनुराग कश्यपने रंगोलीला सुनावले आहे.