मराठी रंगभूमीवरील मानाचा समजला जाणारा नाट्य क्षेत्रातील विष्णुदास भावे गौरव पदक पुरस्कार ज्येष्ठ अभिनेत्री रोहिणी हट्टंगडी यांना जाहीर झाला. ५ नोव्हेंबर रोजी कवी,लेखक आणि नाटककार प्रेमानंद गज्वी यांच्या हस्ते त्यांना प्रदान केला जाणार आहे. दरवर्षी रंगभूमी दिनानिमित्त रंगभूमीची प्रदीर्घ सेवा करणाऱ्या कलाकारास विष्णुदास भावे गौरव पदकाने सन्मानित करण्यात येते. यंदा हा पुरस्कार रोहिणी हट्टंगडी यांना जाहीर करण्यात आला आहे. २५ हजार रु. रोख, विष्णुदास भावे पदक, स्मृती चिन्ह, शाल असे पुरस्काराचे स्वरूप असून प्रेमानंद गज्वी यांच्या हस्ते त्यांना पुरस्कार प्रदान करण्यात येणार आहे. रोहिणी हट्टंगडी यांनी कलाविश्वामध्ये मोठ्या प्रमाणावर योगदान दिलं असून त्यांनी आजवर अनेक मालिका, नाटक आणि चित्रपटांमध्ये काम केलं आहे. 'चार दिवस सासूचे', 'वहिनीसाहेब', 'सख्या रे', 'होणार सून मी या घरची', 'तुझं माझं ब्रेकअप' या मालिकांमधील त्यांच्या भूमिका विशेष गाजल्या.