सलमान आणि कतरिना या दोघांच्या प्रेमाची चर्चा काही वर्षांपूर्वी बॉलिवूडमध्ये होती. खरं तर सलमानमुळेच कतरिनाला बॉलिवूडमध्ये नव्या संधीचे दार खुले झाले. त्यांच्या प्रेमकहाणीला किनारा काही लाभला नाही, प्रेम तुटलं तरी दोघांची मैत्री मात्र कायम राहिली आणि याच मैत्रीखातर ऐनवेळी सलमानच्या आगामी चित्रपटात काम करायला कतरिना चटकन तयारही झाली. पण, या होकारात शाहरूखचाही वाटा मोठा होता. 'भारत' चित्रपटाच्या चित्रिकरणाला अवघे पाच दिवस बाकी असताना प्रियांका चोप्रानं या चित्रपटाला सोडचिठ्ठी दिली. त्यामुळे सलमाननं कतरिना कैफला या चित्रपटासाठी विचारलं. इतक्या कमी वेळेत कतरिनानंही चित्रपटाला होकार दिला. यात शाहरुखचा मोठा वाटा होता. कतरिना शाहरूखच्या 'झिरो' चित्रपटात प्रमुख भूमिकेत आहे. या वर्षाअखेर हा चित्रपट प्रदर्शित होत आहे. त्यामुळे 'झिरो'च्या चित्रिकरणात कतरिना व्यग्र आहे. असं असताना केवळ सलमानच्या चित्रपटात काम करण्यासाठी शाहरूखनं तिला वेळ दिला आहे. या दोन्ही चित्रपटाच्या वेळा शाहरुखनं सांभाळून घेतल्या आहेत. त्याच्यामुळेच कतरिनानं मला होकार दिला असं म्हणत सलमाननं शाहरूखचेही आभार मानले आहेत.
