सलमान खानला बॉलिवूडमध्ये 'भाईजान' म्हणून ओळखलं जातं. या 'भाईजान'चा एखाद्या नवोदित कलाकारावर वरदहस्त असला की बॉलिवूडमध्ये त्याच्या प्रवेशाचा मार्ग निश्चित झालाच म्हणून समजा. तेव्हा अनेक कलाकारांसाठी सलमान 'भाईजान'पेक्षा 'गॉडफादर' अधिक आहे. सलमानमुळे बॉलिवूडमध्ये कित्येकांची करिअर मार्गी लागली आहे. कतरिना, डेझी, जॅकलिन, बॉबी देओल, सोनाक्षी सिन्हा अशी अनेक नावं घेता येतील. तर आता सलमान आपला बॉ़डीगार्ड शेराच्या मुलाचंही करिअर घडवण्याच्या तयारीत आहेत. गुरमित सिंग उर्फ शेरा गेल्या ३० वर्षांपासून सलमानचा बॉडीगार्ड आहे. सलमानसाठी जीवही धोक्यात घालायला शेरा तयार असतो. म्हणूनच या उपकाराची परतफेड करत शेराचा मुलगा टायगरला बॉलिवूडमध्ये लाँच करण्याचं सलमाननं ठरवलं असल्याचं खात्रीलायक सुत्रांकडून समजत आहे. 'हा मोठा झाल्यावर हिरो बनेल आणि मी त्याला हिरो बनवेल' असं आश्वासनं सलमाननं टायगरच्या जन्मावेळी शेराला दिलं होतं. 'बॉलिवूड हंगामा'च्या माहितीनुसार आता सलमान टायगरला लाँच करण्यासाठी एका चित्रपटाच्या शोधात आहे. अर्थात या चित्रपटात टायगर मुख्य भूमिकेत असणार आहे. त्यामुळे आपल्या मुलाला मोठ्या पडद्यावर पाहण्यासाठी शेराही उत्सुक आहे.
