सैफ अली खानची मुलगी सारा अली खान बॉलिवूडमध्ये पदार्पण करण्यास सज्ज झाली असून ती ‘केदारनाथ’ आणि ‘सिम्बा’ या चित्रपटाच्या माध्यमातून प्रेक्षकांच्या भेटीला येणार आहे. विशेष म्हणजे साराचे चित्रपट प्रदर्शित होण्यापूर्वीच ती लोकप्रिय झाली आहे. त्यामुळे तिच्याविषयी जाणून घेण्याची चाहत्यांना उत्सुकता असल्याचं दिसून येतं. यातच तिने बॉलिवूडमधील एक लोकप्रिय अभिनेत्यासोबत लग्न करण्याची इच्छा व्यक्त केली आहे.

चित्रपट दिग्दर्शक करण जोहरच्या ‘कॉफी विद करण’च्या सेटवर साराने वडील सैफअली खानसोबत हजेरी लावली होती. यावेळी तिने अभिनेता रणबीर कपूरसोबत लग्न करण्याची इच्छा व्यक्त केली आहे. हा भाग लवकरच प्रसारित होणार असून त्यापूर्वी ‘स्टार वर्ल्ड’ने एक व्हिडिओ शेअर केला आहे.

या शोमध्ये करणने साराला कोणासोबत लग्न करायला आवडेल ? आणि कोणत्या अभिनेत्याला डेट करायला आवडेल? असे प्रश्न विचारले. त्यावर उत्तर देत ‘रणबीरसोबत लग्न करण्याची इच्छा असून कार्तिक आर्यनला डेट करायला आवडेल’, असं साराने सांगितलं. ‘सोनू के टिटू की स्वीटी’ या चित्रपटामध्ये कार्तिक आर्यन झळकला आहे.

दरम्यान, सैफनेदेखील त्याचा होणारा जावई कसा असावा याविषयी त्याचं मत मांडल्याचं पाहायला मिळालं. सध्या या दोघा बापलेकीचा व्हिडिओ व्हायरल होत असून यात ते धमाल करताना दिसत आहेत.