शाळांमध्ये सेक्स एज्युकेशन अर्थात लैंगिक शिक्षण हा विषय अनिवार्य केला गेला पाहिजे अशी मागणी अभिनेत्री सोनाक्षी सिन्हाने केली आहे. 'खानदानी शफाखाना' हा सोनाक्षी सिन्हाचा सिनेमा ऑगस्ट महिन्यात प्रदर्शित होतो आहे. या सिनेमात सेक्स या विषयाला धरुन कसे गैरसमजच असतात किंवा अनेकदा या विषयावर बोलणं आपण कसं टाळतो. या सगळ्यावर विनोदी अंगाने भाष्य करण्यात आलं आहे. आपण स्वतःला सुधारणावादी समजतो, पुढारलेले समजतो मात्र सेक्स हा विषय आला की मग आपण पुराणमतवादी होतो. हा विषय न बोलण्याचा आहे यावर बोलायला नकोच असे समजतो. संकोच करतो.. सोनाक्षी सिन्हाचा 'खानदानी शफाखाना' हा सिनेमाही याच जुनाट मतांवर भाष्य करणारा आहे. याच सिनेमाबाबत बोलताना सोनाक्षी सिन्हाने लैंगिक शिक्षण शाळांमध्ये देणं गरजेचे असल्याचं म्हटलं आहे. सोनाक्षी सिन्हाचा हा सिनेमा ऑगस्ट महिन्यात भेटीला येतो आहे. या सिनेमाचा ट्रेलर प्रदर्शित झाला आहे त्याला चांगला प्रतिसाद मिळाला आहे. आता या सिनेमाला प्रेक्षकांचा कसा प्रतिसाद मिळतो ते पाहणे महत्त्वाचे ठरणार आहे.
