दरवर्षीप्रमाणे मुंबई पोलिसांचा 'उमंग' कार्यक्रम यावर्षीही मोठ्या उत्साहाने पार पडला. 'उमंग २०१८' या कार्यक्रमाला बॉलिवूडमधील अनेक सेलिब्रिटींनी आवर्जुन उपस्थिती लावली. बॉलिवूडचे शहेनशहा अमिताभ बच्चनपासून ते किंग शाहरुख खानपर्यंत आणि आलिया भट्टपासून कंगना रणौतपर्यंत साऱ्यांनीच कार्यक्रमाला हजेरी लावली होती. उपस्थितांपैकी साऱ्यांनीच पोलिसांच्या शौर्याचे आणि अथक मेहनतीचे भरभरून कौतुक केले. #umang in gratitude to thank the @MumbaiPolice for all the help protection and their untiring service ! #salute to #mumbaipolice pic.twitter.com/qsBhhWjxpe — Raveena Tandon (@TandonRaveena) January 13, 2018 अनुष्का शर्मा, अक्षय कुमार, रणवीर सिंग, दीपिका पदुकोण, आमिर खान, क्रिती सनॉन, शिल्पा शेट्टी, रवीना टंडन आणि प्रभू देवा यांसारखे अनेक बॉलिवूड स्टार या कार्यक्रमाला उपस्थित राहिले होते. यावेळी महाराष्ट्राचे मुख्यमंत्री देवेंद्र फडणवीस आणि बॉलिवूडचे शहेनशहा अमिताभ बच्चन यांनी मुंबई पोलिसांच्या कॅलेंडरच्या तिसऱ्या आवृत्तीचे अनावरण केले. संपूर्ण बॉलिवूड उमंग महोत्सवात आले म्हटल्यावर तिकडे बॉलिवूडचा तडका पाहायला मिळणार नाही असे तर होणार नाही. शाहरुखने त्याची 'सिग्नेचर स्टेप' करुन दाखवली तर दीपिका आणि रणवीरच्या उपस्थितीनेच अनेकांची मनं जिंकली. अनिल कपूर आणि अर्जुन कपूर हे 'माय नेम इज लखन' गाण्यावर थिरकले. डान्सर प्रभू देवाच्या चाहत्यांना त्याला प्रत्यक्ष नाचताना पाहणं हा एक अविस्मरणीय क्षण होता. हृतिक रोशन आणि इतर कलाकार मुंबई पोलिसांचे आभार मानायला विसरले नाही. रणबीर कपूर, मलायका अरोरा, क्रिती सनॉन यांनीही त्यांच्या डान्सने उपस्थितांचे मनोरंजन केले. गायक मिका सिंगने 'ता रा रा रा' आणि 'इश्क तेरा तडपावे' ही दोन गाणी गायली. आलिया भट्टने 'ऐ दिल है मुश्किल' सिनेमातील 'तेरे बिना गुझारा है मुश्किल' हे गाणे मुंबई पोलिसांना समर्पित केले. अक्षय कुमार, सुनिल ग्रोवर आणि मनिष पॉल यांनीही त्यांच्या विनोदाच्या तडक्याने उपस्थितांना खळखळून हसवले. फार कमी कार्यक्रम असे असतात जिकडे कंगना आणि हृतिक समोरा समोर येतात. 'उमंग २०१८' हा त्याच कार्यक्रमांपैकी एक ठरला.