अभिनेता शाहरूख खान अनेकदा प्रसारमाध्यमे, सोशल साईटसवर स्वत:च्या मुलांचे कौतूक करताना दिसतो. मात्र, खान कुटूंबातील नवा सदस्य अबराम याच्याविषयी शाहरूख फारसे बोलताना दिसत नाही. चाहत्यांनी ट्विटरवर याविषयी शाहरूखला छेडले असता, आपण लवकरच अबरामचे छायाचित्र चाहत्यांसाठी प्रसिद्ध करणार असल्याचे सांगितले. सध्या शाहरूख खान वर्ल्ड टूरवर असला तरी, दररोज आपण मुलांच्या संपर्कात राहत असल्याचेही यावेळी त्याने म्हटले आहे. शाहरूख आणि त्याची पत्नी गौरी खान यांच्या या अपत्याचा जन्म सरोगसीद्वारे झाला आहे. त्याच्या जन्मानंतर शाहरूखला बऱ्याच वादांना सामोरे जावे लागले होते. त्यामुळे शाहरूखने अबरामला प्रसारमाध्यमांपासून दूर ठेवण्याचा निर्णय घेतला होता.
मोठा मुलगा आर्यन, १३ वर्षाची मुलगी सुहाना आणि अबराम नावाचा छोटा मुलगा असलेला शाहरूख आपल्या मुलां प्रती अतिशय भावूक असून, त्यांची तो खूप काळजी घेत असल्याचे दिसून आले आहे. काही दिवसांपूर्वीच माध्यमांपासून दूर ठेवण्यासाठी आर्यनला शिक्षणासाठी परदेशात पाठवण्याचा निर्णय शाहरूखने घेतला होता.