बॉलिवूड कलाकारांसोबतच स्टार किड्सची देखील चर्चा मोठ्या प्रमाणात होत असते. त्यात बॉलिवूड अभिनेत्री करिना कपूर खानचा लाडका लेक तैमूर अली खान तर नेहमीच चर्चेत असतो. यामुळे तैमूरची आजी आणि जेष्ठ अभिनेत्री शर्मिला टागोर यांना त्याची चिंता वाटते असं त्यानी एका मुलाखतीत सांगितले आहे. सुभाष के झा यांना दिलेल्या मुलाखतीमध्ये शर्मिला यांनी तैमूरची चिंता वाटते असे म्हटले आहे. "मला तैमूरची थोडी चिंता वाटते. आजपर्यंत या कुटुंबातील सगळ्यांनीच मीडियाचे लक्ष वेधून घेतले आहे. ते आपल्याला एका शिखरावर घेऊन जातात आणि नंतर ते खाली देखील आणतात. पण सध्या तैमूरवर याचा परिणाम होत नाही कारण तो खूप लहान आहे. त्याला आपल्या आजूबाजूला काय घडत आहे याची थोडीही कल्पना नाही. पण नंतर जेव्हा तो मोठा होईल आणि तेव्हा त्याला मिळालेले मीडिया अटेंशन जर काढून घेतले तर त्याच्यावर याचा परिणाम होऊ शकतो. त्यामुळे आम्हाला त्याची काळजी वाटते. पण साराच्या म्हणण्यानुसार आपण यावर काही करु शकतो का? खरे सांगायचे झाले तर मीडियाशिवाय आजच्या जगात आम्ही जिवंत नाही" असे शर्मिला यांनी मुलाखतीत म्हटले आहे. पुढे त्या म्हणाल्या, "तो निरागस आणि लहान आहे. मी आशा करते की त्याच्यावर या सगळ्याचा परिणाम होणार नाही. मी मीडियाला विनंती करते की, तैमूरच्या बाबतीत थोडे संवेदनशील रहा."
