मराठीतील लोकप्रिय जोडी अमेय वाघ आणि निपुण धर्माधिकारी लवकरच 'हाय जॅक' सिनेमातून प्रेक्षकांच्या भेटीला येणार आहेत. आकर्ष खुराना दिग्दर्शित या सिनेमात सुमित व्यास, मंत्रा, सोनाली सैगल, कुमुद मिश्रा यांच्या मुख्य भूमिका आहेत. येत्या १८ मे रोजी हा सिनेमा प्रदर्शित होणार आहे. फॅण्टमची निर्मिती असलेला हा बॉलिवूडमधील पहिला स्टोनर कॉमेडी सिनेमा म्हणून ओळखला जाणार आहे. चार ते पाच मित्र मिळून पहिल्यांदा विमान हायजॅक करतात. त्या विमानातील सगळेच प्रवासी एका चुकेमुळे मद्यधुंद अवस्थेत जातात आणि मग खऱ्या हास्यकल्लोळ प्रवासाला सुरूवात होते. सुरूवातीला या सिनेमाची तारीख २० एप्रिल ठरवण्यात आली होती. पण काही कारणांमुळे सिनेमाचे प्रदर्शन पुढे ढकलण्यात आले होते. पण आता १८ मे रोजी हाय जॅकची संपूर्ण टीम प्रेक्षकांना खळखळून हसवायला सज्ज झाली आहे. आकर्ष खुरानाचा हा दिग्दर्शनातील पहिलाच सिनेमा असल्यामुळे त्याला या सिनेमाकडून फार अपेक्षा आहेत. आता हा सिनेमा प्रेक्षकांना किती आवडतो की नाही हे तर येणारा काळच ठरवेल.
