'द कपिल शर्मा शो'मधील अभिनेत्री सुमोना चक्रवर्ती ही कपिलचा शो सोडणार असल्याची जोरदार चर्चा टेलिव्हिजन विश्वात आहे. सुमोना या शोमध्ये सरलाची भूमिका साकरते. मिळालेल्या माहितीनुसार, सुमोना या आपल्या भूमिकेवरून निर्मात्यांवर नाराज झाली आहे. कपिलच्या शोमध्ये आणखी एक नवीन पात्र समाविष्ट करण्याची तयारी सुरू आहे. कपिलच्या प्रेमिकेची भूमिका साकारणारे हे नवीन पात्र असणार आहे. त्यावर सुमोनाने हरकत घेतली असल्याचे समजते. याशिवाय, तिने निर्मात्यांकडे आपल्या मानधनात वाढ करण्याचीही मागणी केली होती. त्यावर अद्याप कोणताही निर्णय न झाल्याने ती या शोला रामराम ठोकणार असल्याचे सांगण्यात येत आहे. कपिल आणि सुमोनाची जोडी 'कॉमेडी नाईट्स विथ कपिल' या शोमधून लोकप्रिय झाली होती. शोमध्ये सुमोना कपिलच्या पत्नीच्या भूमिकेत दिसून आली होती. कपिल आणि सुमोना एकमेकांची टेर खेचताना या शोमध्ये धम्माल उडवून देत असत.