बॉलिवूड अभिनेता सुशांत सिंह राजपूतचं निधन होऊन आता बराच काळ लोटला आहे. मात्र, अद्यापही त्यांच्या मृत्यूमागील कारण स्पष्ट झालेलं नाही. सध्या या प्रकरणी सीबीआय, एनसीबी यांच्याद्वारे तापस सुरु आहे. तर दुसरीकडे सुशांतचे चाहते त्याला न्याय मिळावा यासाठी जोरदार मागणी करत आहेत. यामध्येच सुशांतच्या मेहुण्याने श्वेता सिंह किर्तीच्या पतीने एक पोस्ट शेअर करत सुशांतला न्याय मिळेल का असा प्रश्न विचारला आहे. सोबतच त्यांनी सुशांतचा एक जुना फोटोदेखील शेअर केला आहे.

सुशांतचे मेहुणे विशाल किर्ती यांनी एका लग्नातील फोटो शेअर केला आहे. या फोटोमध्ये त्यांच्यासोबत सुशांत दिसून येत आहे. “आपण अंतिम रेषेपर्यंत पोहोचलो आहोत? सुशांतला खरंच न्याय मिळेल का? सुशांतचा निरागस चेहरा दिवसाच नाही तर रात्रीदेखील आमच्या स्वप्नांमध्येही राज्य करु लागला आहे”, अशी पोस्ट विशाल किर्ती यांनी शेअर केली आहे.

दरम्यान, १४ जून रोजी सुशांतने त्याच्या राहत्या घरी गळफास घेऊन आत्महत्या केली. त्याच्या निधनानंतर कलाविश्वात एकच खळबळ उडाली आहे. काहींच्या मते, सुशांतने नैराश्यात येऊन हे पाऊल उचललं. तर काहींच्या मते, बॉलिवूडमधील घराणेशाहीला कंटाळून त्याने जीवनाचा अंत केला. मात्र, अद्यापही त्याच्या मृत्यूमागील कारण स्पष्ट झालेलं नाही.