अभिनयासोबत एक फिटनेस आयकॉन म्हणून अतिशय लोकप्रिय असणारी अभिनेत्री म्हणजे सुष्मिता सेन. सुष्मिताचा आज वाढदिवस आहे. तिचा जन्म १९ नोव्हेंबर १९७५ साली हैद्राबादमध्ये एका बंगाली कुटुंबात झाला होता. सुष्मिताचे वडील हे भारतीय वायू सेनेत विंग कमांडर होते तर आई ज्वेलरी डिझायनर होती. सुष्मिताने १९९६ मध्ये प्रदर्शित झालेल्या ‘दस्तक’ या चित्रपटातून बॉलिवूडमध्ये पदार्पण केलं. सुष्मिता अभिनयासोबतच आपल्या वैयक्तिक आयुष्यामुळे देखील चर्चेत असते.

सुष्मिता एक सिंगल पेरेंट असून ती तिच्या दोन्ही मुलींचा खूप चांगल्या पद्धतीने सांभाळ करते. सुष्मिताने सिंगल पेरेंट बनून आपल्या पालकांना देखील अचंबित केलं होतं. तिने दोन मुलींना दत्तक घेतलं असून त्यांचं नाव रिने आणि एलीशा असं आहे. तिने रिनेला २००० साली दत्तक घेतलं होतं तर एलीशाला २०१० मध्ये. लक्षवेधी बाब म्हणजे सुष्मिता २५ वर्षांची असतांना तिने रिनेला दत्तक घेतलं होतं.

१८ व्या वाढदिवशी तिने रिनेला तिच्या खऱ्या आई-बाबांविषयी सांगितलं. सुष्मिता म्हणाली, “मला माझ्या मुलीला चुकीची माहिती द्यायची इच्छा नव्हती. कारण आई-वडिलांसमोर गेल्यावर तिला वाईट वाटू नये. तुला जेव्हा कधी तुझ्या आई-वडिलांना भेटण्याची इच्छा होईल तेव्हा मी तुला त्यांच्याकडे घेऊन जाईन.” असं वचन तिने आपल्या मुलीला दिल.