डॉ. श्रीराम लागू आणि दीपा लागू यांचा मुलगा तन्वीरच्या स्मृतीप्रित्यर्थ दिला जाणारा तन्वीर सन्मान पुरस्कारासाठी यंदा लेखक, दिग्दर्शक सतीश आळेकर यांची निवड करण्यात आली आहे. तर नाट्यधर्मी पुरस्कार मुंबई फॅट्स थिएटरचे संस्थापक फैजे जलाली यांना जाहीर करण्यात आला आहे. शनिवारी पुण्यात झालेल्या पत्रकार परिषदेत दीपा लागू यांनी ही माहिती दिली. यावेळी जेष्ठ अभिनेते डॉ. श्रीराम लागूदेखील उपस्थित होते.

आळेकरांच्या ‘महानिर्वाण’, ‘मिकी आणि मेमसाहेब’, ‘महापूर’ अशा अनेक नाटकांनी रंगभूमीवर नवीन प्रवाह निर्माण केला आहे. त्यांच्या अनेक नाटकांचे इंग्रजीसह इतर भाषांमध्ये भाषांतरही झाले. तर फैजे जलाली या अभिनेत्री, शिक्षिका, लेखिका म्हणून कार्यरत आहेत.

एक लाखाची रक्कम व सन्मानचिन्ह असे तन्वीर सन्मान पुरस्काराचे स्वरूप आहे. येत्या ९ डिसेंबरला यशवंतराव चव्हाण नाट्यगृहात पुरस्कार वितरण कार्यक्रमाचे आयोजन करण्यात आले आहे.